樂園粉麵專家

Open Now

Now Closed

尋日心血來潮，食晏時行咗4個字走去食，一去到座無虛席，好彩一條友，攝咗個位，一坐底即點牛雜河。人太多關係碗粉都過咗15分鐘先上枱。牛雜份量絕不欺場，金錢肚四大片、一粉腸一肥腸加埋蒡肺各一大舊，仲有兩片小肚。河粉滿到大力啲夾都瀉咁泄。個湯充滿牛味，清而香濃，加埋佢哋嘅獨門（估：加咗冬菜）辣椒油（記住要落渣）真係正到爆。河粉略嫌太厚，唔夠滑，應覺係粗獷型系列。金錢肚好入味，淋得嚟有咬口。肥腸好多膏，一咬甘香十足。粉腸油香入味。肺彈牙爽脆。不得不提牛蒡口感香糯，質感實淨，唔會一夾就散。我雖然唔算係常客，不過只要知自己會去開嗰頭，就一定整番碗牛雜粉。