616牛肉火鍋專門店 (Closed)

自從黃埔開咗地鐵之後， 多咗地方去揾美食， 今日去距離地鐵站二分鐘嘅民泰街揾食， 好快就畀呢間舖頭吸引住。間舖頭竟然放到架車， 門口擺咗好多隻牛嘅座位，好打意。入到去見到好多特色牆， 有曾灶財嘅字牆， 亦有由馬賽克砌成嘅畫， 仲有呢啲傳統街市中國掛字， 影相呃like都抵。醬油區都有多款選擇， 最特別佢係鲜牛油醬油， 聞落去都好有牛味。我哋揀咗牛骨清湯底同沙嗲湯底， 牛骨都好入味， 食到我哋舐舐脷。欣賞佢哋喺餐前送上水果， 非常合符健康飲食法則。呢隻澳洲和牛三角柳， 店員教我哋灼6秒， 入口即溶，牛味濃，正。黑柏葉配上凍嘅麻醬，食到索索聲， 醬料配搭新鮮， 好過癮。竟然有羽衣甘藍做蔬菜， 貪得意叫來試下， 原來煑極都唔係好淋， 真係好有纖維。呢個紫菜卷脆卜卜，必食推介。叫埋呢兩支特色飲品， 滿足地完成我哋今日嘅晚餐。望下張餐纸， 原來周圍都有分店， 鍾意食牛嘅我地， 真係區區都有得食。