屋喔 (Closed)

今日朋友介紹喺旺角朗豪坊附近有一間餐廳竟然有個騎樓仔，環境仲要唔錯添，一於去試試佢先。西班牙特調，雖然餐牌上面寫咗呢個特調係二人份，不過我估唔到佢真係咁巨大，成個保齡球咁勁啊，入口味道清甜，有淡淡嘅紅酒味，甜酸度非常之平衡，仲有好多新鮮嘅生果係入面，真係飲咁大杯都唔會嫌多啊。海苔鹽酥雞，炸得勁香脆，一啖一粒，外皮唔會有多餘嘅脂肪，特別鍾意佢面頭舖滿大量嘅海苔，原來鹽酥雞夾埋海苔一齊食，個味道係估佢唔到咁夾。跟餐嘅凱撒沙律都絕對無因為跟餐而揸流攤，沙律菜新鮮爽脆不特止，個凱撒沙律汁啲芝士味夠哂香濃，襯埋上面啲麵包粒同埋煙肉碎一齊食，真係想嗌多一個啊。黑松露野菌蚵仔燉飯，呢間餐廳竟然用到蚵仔嚟做意大利飯咁 fushion！？真係要即刻嗌嚟試下，將中間嗰一堆黑松露撈勻，成個飯即刻充斥住勁濃烈嘅黑松露味之餘，仲有淡淡嘅芝士同埋忌廉味滲出，本身個飯嘅味道已經非常好㗎啦，點知試一啖阿仔真係不得之了，啲蚵仔個蚵身飽滿不特止，入面仲勁 juicy，份量又夠哂多喎，下次再嚟真係要番兜呢個飯啊。跟餐嘅甜品揀咗木糠布甸，布甸嘅奶味香濃，口感軟滑，不過如果少甜啲相信會更加好。