豐鍋雞煲 (京瑞廣場1期)

Open Now

Now Closed

阿女上次來「豐鍋」食過午餐後，表示很想來吃雞煲，所以今晚一家人來試吓。先叫咗一個「滋補螺片花膠雞煲」（半隻$188 ），雖則話係半隻雞，但我覺得都幾大隻，隻雞都尚算滑，個湯都幾好味，花膠都有好幾舊。食到咁上下就打邊爐，我哋叫咗一客「頂級安格斯牛小排」（ $178 ），份量唔少，而且雪花紋好靚，脂肪均勻，食落去都好鮮嫩。另外叫咗手工即炸脆魚皮（ $48 ），冇諗過係咁大塊，好驚喜！好脆而且好有味！阿仔不停再要！再要！另一驚喜係響鈴，佢有三款唔同響鈴，今次我哋揀咗即炸紫菜響鈴（ $38/3件），條響鈴都大條有紫菜夾住喺裏面，係幾有特色。至於「手工四寶丸」（$85）就有蝦丸、鯪魚丸、墨魚丸，同埋黑墨丸，全部人手打，仲放幾粒蟹籽喺面，食落好彈牙，好食！雜菜籃（ $68 ）有三款菜，全部都好新鮮、深綠色好靚。佢都有幾款特飲，我哋揀咗「大話七」（$32）同埋「水蜜桃梳打」（ $38 ），前者其實係七喜加話梅，話梅味唔算重，不過感覺好過淨係飲汽水，後者冇乜特別，幾好飲呀！