無麵不歡 - 中華私房粉麵 (Closed)

最近夏日炎炎唔係太開胃食唔落飯，所以最岩食就係麵條啦！但係就咁淨食碗麵又好似差緊啲野咁，梗係要叫啲前菜同埋小食食豐富少少。飲品叫左椰子汁，係罐裝飲料，飲落好香濃嘅椰奶味。店員介紹最近嘅promote，只要一碗麵加38蚊就可以任食合共有九款嘅特式小食！由於一叫任食就要成張枱都要叫，所以我地兩個都加錢轉任食。先講左正餐先，我地叫左順德卜卜蜆花甲粉絲、原創胡椒豬肚雞麵。黃蜆同花甲有成十隻份量多又大，湯底清甜。而另一碗湯底胡椒味相當香濃，豬肚爽口彈牙，雞都幾嫩滑。小食方面全部熱食都即叫即製，煉奶炸饅頭外脆內軟好正！香煎蛋餃外皮薄薄地有蛋香味，入面包住啲碎肉。紅油木耳夠爽口，醒胃又好食。麻辣口水雞唔算太辣，雞都幾滑。蒜香B仔雞翼尖幾惹味，帶少少辣味幾過癮。