Fullhouse Signature (Closed)

呢間餐廳係地庫，當去到門口時， 已經俾佢地既裝修吸引左，特別係門口架車仔同甜品。我地訂左位，因為唔過半數，要等到夠半數先可以入座。真係有D唔明，單數人頭既半數一定要4捨5入......所以係度等既時候就望下D甜品。耐心一看，其實甜品都係冇乜特別，只係裝飾得靚D啫。個MENU有D難睇，因為卡通同畫都插入MENU內。插畫係靚，但沒必要既插圖真係令我地有D混亂。一坐底，侍應會幫我舖餐巾，服務感覺好貼心。食到中段，侍應會幫我地換碟，不過我隻碟係濕既 一行5人，前菜我地叫左炒什菇同沙律。什菇不過不失，有3種以上既菇菌。沙律都OK，材料新鮮。主菜叫左魚同RIBS。呢2個主菜賣相唔錯，見到都好想食。RIBS冇燒的香味，但勝在夠"林"。另外點左香芒蟹肉炒飯同素菜長通粉。炒飯類似越式炒飯，上面有肉鬆。但味道冇越式咁香，飯底都乾身。長通粉都唔錯，配一片法包，賣相幾好。甜品要左：雪糕係呍呢拿、士多啤梨同朱古力。放左好耐都仲夠冰凍。飲品方面，我地都點雜果果汁類。因為每杯都有一個好特別既名稱，我都已經忘記左個名。不過果汁都唔錯，校得幾好飲。