四季常餐 (德輔道中)

Open Now

Now Closed

中環係我眼中食乜都貴，連最平民既常餐都變得不平民…….但居然有餐廳係中環區做到$50有找既常餐!!! 唔太肚餓既我同友人，當然要撐下啦!🤗星期五晚市時間，餐廳人流唔多，無需等位。晚餐選擇唔算多，6款飯同3款麵，友人表示好耐無食沙嗲牛肉，所以二話不說點左個特濃沙嗲牛肉公仔麵 $48湯底如其名，真係好濃沙嗲，我個人唔中意濃花生味既沙嗲，呢個正合我心意😋。公仔麵煮到偏硬，我中意。沙嗲牛肉亦比得慷慨。四季茄牛通 $48我一向都中意食羅宋湯通粉，本以為呢個茄通應該同平時食開嗰d大同小異之際，先現我諗多左😮。呢個湯偏酸，味道比較素，個人唔太中意個湯；牛肉口感ok，唔會好乾好鞋，可以接受。常餐包招牌炒蛋+多士老實講，個賣相真係呃得下人，燈黃色既炒蛋，配烘到少少燶既多士，根本就係我杯茶!! 😏可惜，多士已經放左一段時間，唔再脆口，而且仲有少少韌既口感；多士牛油味好濃，相信如果新鮮出爐，應該好正。🤔 至於招牌炒蛋，我同友人都認為唔好味😣，一黎完全無蛋香，二黎炒到幾碎，三黎幾鹹，個炒蛋食落有雞粉/味精味，個人覺得齋落鹽調味其實已經好夠，唔駛加咁多野。