炙・宴 (The LOHAS康城) (Closed)

同大少入康城上堂，咁難得入康城就當然要睇下有咩好餐廳，行過先俾佢地門口嘅飛天豬吸引，然後見到個「幸せの二重丼」定食覺得又幾吸引，所以就決定入去食個日式雙重味覺餐。「幸せの二重丼」定食就即係一個定食有丼飯同烏冬兩款主食，而且仲有埋沙律、味噌湯、沖繩豬肉煎餃、甜品同埋飲品，夠豐富得嚟價錢都唔貴，絕對係性價比高之選。大少就叫左個 宮崎和牛丼 配 烏冬，宮崎和牛肉片厚薄均勻，而且燒得好香口， 入口夠腍身之餘仲好重牛味，配埋甜甜地嘅燒肉醬汁，真係送飯一流。另一個主食清清地唔會太鹹嘅鰹魚昆布湯，再加埋彈牙嘅烏冬，真係唔錯哦。我就來一客 角切魚生丼配冷烏冬，雖然係角切魚生，但材料都好新鮮，三文魚、吞拿魚、帶子、三文魚籽、青瓜粒及玉子，賣相十分吸引。而配搭嘅冷烏冬入口煙靭，所以話絕對係夏日必食之選。另外，配菜嘅味噌湯、沖繩豬肉煎餃同埋黃豆粉蕨餅都冇閃失，好味又啱我口味。