大澳德發 (Closed)

呢間表面看似好尋常嘅餐廳， 竟然有大澳特色菜食， 咸魚蒸馬友、 大澳蒸黃花魚、 豆腐魚頭蜆仔湯、 卜卜蜆等等嘅菜式，真係唔係周圍都食到。難得嚟到呢度， 梗係要試下啲出面食唔到嘅菜食啦。 我同男朋友兩個人， 嗌咗三個餸， 分別係"果皮古法籠仔蒸龍躉肉"、"卜卜蜆煲配鴛鴦米"、同埋"墨魚餅"。墨魚餅: 炸得香脆， 一碟最有六塊咁多 ，重點在於個醬汁酸酸甜甜好好味。古法果皮籠仔蒸龍躉肉: 用料十足，裏面除咗果皮之外， 仲有蒜頭、冬菇、同埋肉絲。龍躉肉蒸得嫩滑， 魚皮煙煙靭靭好有彈性， 骨膠原十足。 啲配料同魚好夾， 可以成龍食曬 ，一粒都冇得淨。卜卜蜆: 三個餸入面最特別就係呢一個卜卜蜆， 服務員直接將一盤生嘅蜆上枱， 上面由芫茜、辣椒、同埋勁多蒜蓉做調味， 喺我哋面前直接將啲蜆炒熟， 等我哋品嚐完啲蜆之後， 再加入魚湯、白飯、同埋炒過嘅米飯混合埋一齊煮， 就變咗另一個菜式"泡飯"。呢個泡飯做得好出色， 有好香蒜頭味， 由於湯底係魚湯所以已經有鮮味， 在家上頭先煮完蜆，剩返落嚟嘅蜆汁， 全部畀啲飯吸收曬， 真係好食到停唔到口。