西環碼頭 (Closed)

阿媽同家姐出咗街血拼，得番我同老爸兩個，男人的浪漫緊係去食中餐啦！於是近近地去咗樓下西環碼頭食。西環碼頭主打海鮮，出面可以揀海鮮。近排有點熱氣，生飛滋，叫個冬瓜盅夠消暑又夠下火，點都有啖湯飲下先。飲落有濃郁的鮮甜味，冬瓜肉清甜，不會燉到溶溶爛爛。有蝦肉、帶子、瘦肉等，還有夜香花！老爸餐餐都要食魚，所以叫了古法蒸魚，其實不是全蒸，是把斑先炸，再用半炆煮的方法做，很花心思的。老實講，一向少食魚的我都覺得呢味幾唔錯，我本身怕魚會腥，當然這條魚很新鮮，完全不會腥。另外，有很多配料好似冬菰、白菜仔，還有瘦肉，吊起魚的鮮味，個汁會偏重味一點，送飯一流！另外，我呢個食肉獸叫咗個冰鎮咕嚕肉！不得了，原來真係用冰上！咕嚕肉炸到脆卜卜，出面凍凍地、脆脆的，入面還有一點暖，層次分明，絕對是巧手工的一道菜。士多啤梨酸酸地，可以消滯。我未食過冰菜，之前電視見肥媽介紹過，一於試下！上湯煮，冰菜好爽，吸收晒上湯味，仲有金華火腿絲。最後還有腐竹糖水送上，兩個麻甩佬捧住個肚番屋企！