Bamboo Thai (如心廣場一期)

Open Now

Now Closed

行過如心廣場，本來想試吓非常出名嘅段純貞牛肉麵，但望見門口嗰條早早出現嘅超長人龍，唯有放棄呢個念頭，轉戰呢間同樣人氣旺盛嘅泰國菜，門口有得拎飛，行一陣街返嚟就差唔多可以入座。餐廳食物選擇唔少，仲有啲比較少見嘅菜式，例如黃薑脆炸魷魚、招牌冬陰雞翼、泰式紅咖喱魚餅同火山排骨之類，而且價錢唔貴，嗌多幾個小菜都唔會肉赤。魚餅一客四件，加入紅咖喱同泰式香料，香口彈牙，配上酸酸甜甜嘅泰式醬汁，非常開胃。冬陰公湯酸辣醒神，香料嘅味道亦夠重，而且材料豐富，非常抵食。見幾乎每枱都有嗌呢道火山排骨，當然要湊下熱鬧，一上枱果然氣勢十足，份量超大，細份嘅都足夠三四個人分享。排骨每件都大大件，煮到夠哂軟腍，配上特製嘅酸甜醬汁同大量蔥蒜，惹味開胃。泰式大蝦炒金邊粉份量雖然唔算多，但炒得乾爽夠火候，大蝦亦可口彈牙。先生食泰國菜一定唔少得青檸梳打，加入九層塔取代一般會用到嘅薄荷葉，令到成件事更加泰式，清爽解渴。玫瑰黑糖薑茶係我嘅至愛，香甜暖胃，最適合飯後慢慢嘆。餐廳嘅食物質素唔錯，而且夠晒創新，價錢亦合理，加上舒適嘅環境同優質嘅服務，係享受泰菜嘅好選擇。