醉胡爐 (Moved) New Location

身為火鍋愛好者既我，得閒就會去試下新既火鍋餐廳，今次就上網搵到呢間醉胡爐，一試佢個特色湯底，未去個時已經諗定咗係要鮮椰青雞鍋。可能因為book咗位既關係，可以有間房仔坐，無其他人望住食係會輕鬆啲。唔講咁多直入主題，一開始會有員工係大家面前快炒個雞鍋底，中途加入酒時係幾精彩，成件事已經令我覺得好香好好食。不得不提，個火鍋勺設計得好好用。個湯底好好飲，清清甜甜有淡淡椰香，碌下嘢食，自自然然又會想飲一啖，冰豆腐索哂啲湯底，變得更加好食。手工餃子同手打丸都整得非常好，手打丸夠彈牙。因為咩肉都想食，所以分別叫咗豚拼盤同牛拼盤，黑毛豬特別香濃，而和牛好出色，入口即溶，所以再追加咗一份和牛，食個夠。總結，打邊爐個湯底真係會令所有食材都加分，下次嚟個時會再試下其他湯底。而且環境都幾舒服，無咩壓迫感，值得再一試。