食包 (Closed)

經過見到呢間裝修幾得意嘅玩味漢堡店，價錢唔貴，幾有特色，就試下佢個招牌《WB經典牛堡$62》吸引我嘅，除咗係幅圖之外，仲有佢嘅煎流心蛋。 好少見到漢堡會有煎蛋，仲要係流心。佢冇講大話。我咬第一啖，個流心蛋黃就沿住我隻手一路流，係咁滴滴滴，滴落張枱，再滴落我大髀。 呢個咁震撼嘅畫面，我梗係第一時間影低佢。但由於畫面有點兒不雅，都係唔post上嚟啦。塊牛有洋蔥碎，但略嫌有啲韌，同牛味唔太出。生菜同蕃茄夠新鮮，令到成個包冇咁膩。套餐《+$18》本身想要甜蕃薯條，但老闆話來貨價實在太貴太貴，忍痛取消。改食《青山炸雞》點黑松露醬（雖然唔知點解叫青山）。啲雞件大大嚿，分量都幾多，連埋雞皮炸好鬆脆，但好熱氣牙 ＞＜ 食完牙肉腫咗了(╥╯^╰╥)嘢飲見到竟然有lemon coke！係除咗「生可樂」之外，另一個新奇可樂品種。 黃色外型，潮味十足，但飲落其實同原味可樂無異，畢竟原味可樂本身就自帶檸檬味。買外賣過程遇到段小插曲。老闆反應快，態度非常有禮，係而家非常罕見嘅服務態度，呢點絕對值得嘉許！