滿樂潮州 (美麗華廣場1期) (Closed)

好耐無食過中菜，前幾日見到尖沙咀美麗華新開滿樂潮州，就轉下口味食下潮州菜。今次人少少就點左一個細份既滷水鵝肉拼盤，但其實份量都唔細，而且仲齊哂幾款，難得滷水入味得黎完全唔會過鹹，鵝肉肥瘦亦算適中。炸雙棗都係潮州酒家的平常菜，如果未食過可能唔知係咩，但其實即係蝦棗與蟹棗，有d似平時食既炸蝦丸和炸蟹餅，不過就會多左馬蹄，所以咬落去會更加爽口。太極素菜羹淨係睇賣相都覺得好有心思，精緻得黎又好中華風，捧到上枱都竟然完全無變形 XD 侍應仲細心到分完兩碗但都無撈亂顏色，味道清淡，但質地比較稠，所以每人分完兩碗都覺得好飽下。平時出街食多數揀炒飯，不過今次見到有蔥蒜牛肉崧煨飯就試下，比炒飯會濕身d但又唔會太油，裡面都幾多牛肉片，而且肉質都幾滑唔韌，老人家都咬到。食親潮州菜都會叫煎蠔餅，見到有款係用九肚魚做烙餅，當然要貪新鮮，出乎意料原來好味過蠔餅，煎到脆脆地好香口，九肚魚無食蠔咁重口味，更加突出到烙餅味道。甜品就揀左反沙芋，出面果層係脆脆地既白糖，入面包住芋頭，不過糖衣果層就略為厚左d，食完幾舊會覺得比較甜。