潮式腸粉 (Closed)

之前睇某報紙介紹過呢間"潮式腸粉" 訪問過呢度嘅老闆, 佢話佢係新移民, 佢日日喺舖頭，唔知香港人同內地人嗌交-"我所認識的香港人都好好人，對新移民好支持，我好感恩！ 希望大家能和平共處....... "好! 就嚟試下-- 蠔仔腸粉 $31.00--米漿腸粉皮幾煙韌, 包着芽菜、生菜、冬菇、蝦米、土魷同埋主角蠔仔, 可能有蝦米、土魷啦, 帶出海鮮甜味. 不過內藏生菜芽菜, 就食得比較"論盡" 最後要出動較剪 (好在我每次同百厭仔出街食飯都有較剪跟身啫) 潮式炒粿汁 $38.00--似港式乾炒牛河, 不過牛肉換咗扎肉. 粿汁煙煙韌韌幾特別. 味道唔錯. 潮式酥皮豆腐 $25.00--豆腐雖然外脆內嫩, 但豆腐入口味道怪怪地, 可以用苦味來形容, 可能係呢味菜嘅特色呱. 但絕對唔係我杯茶, 我真係接受唔到囉.埋單 $94.00