江南瀨粉 (福榮街) (Closed)

深水埗多平野食大家都知，好野食又多，而且有好多特色野食，放工同朋友去覓食，發現係文記車仔麵附近開左間叫‘江南瀨粉’，仲要係手製瀨粉，都幾多人幫襯，一試無防。老闆同店員都好有禮貌，熱情招呼客人。我地要左清湯同蕃茄湯底，想食辣都有酸辣同麻辣，配菜都有好多選擇，我揀左鮮蝦雲吞、柱侯牛根、蠔油冬菇同家鄉煎魚餅，另外要左香煎墨魚餅。上菜速度算快，份量好大，我係清湯試下湯底先，濃得黎清而甜，唔會好油膩，而且係冇落味精。瀨粉煮到岩岩好，唔知係咪新鮮製作嘅關係同平時食開嘅口感完全唔一樣，煙韌得黎爽口彈牙，唔會硬身，而且吸到湯汁嘅味道。鮮蝦雲吞爽口彈牙，蝦味鮮濃。牛根炆到好入味，膠質出晒黎，岩晒女仔食。蠔油冬菇唔會過咸，好鮮甜同諗軟，煎魚餅好貼心，係另上，朋友嘅炸雞翼都係另上，唔會浸左落湯變軟。魚餅煎到好香口，夠彈牙，裡面有少量香蔥、莞茜，味道更加豐富。小食都唔錯，煎墨魚餅好有墨魚味，彈牙爽口。炸雞翼好推介雞翼迷一定要食，炸到好香口，而且充滿咸香味，好有兒時嘅味道。