黑木 (Closed)

平時成日去金巴利街買韓國貨&嘢食，見到一間好似得度門寫住黑木但唔知食咩嘅餐廳，令到我好好奇就上網睇下食D咩，原來係Omakase廚師發辦而且以串燒做主題，於是我就同Honey嚟試吓。我哋訂咗6點鐘，由於時間尚早餐廳都未有其他客人，環境靜靜地而且燈光好柔和個感覺好舒服。由於係Omakase廚師發辦，所以就唔使揀食咩，真係煮到埋嚟就食。小食：一款小食似鱈魚零食，但超香脆，配上沙律醬好好味。前菜：花螺蘋果沙律，花螺以醬汁煮幾惹味，日本蘋果真係超爽口又甜，配埋青瓜好啱夏天食。北寄貝兩食先上咗清酒煮北寄貝，北寄貝肉質超爽，味道鮮，食完仲可以飲埋個湯，好鮮味！然後再嚟北寄貝嘅裙邊燒，第一次以燒嘅方式，都幾特別。雞軟骨免治雞肉釀冬菇配上溫泉蛋，將溫泉蛋黃鋪到冬菇上一齊食超美味，而且免治雞肉內有軟骨，口感好特別。花椒油燒牛舌，第一次呢個配搭，牛舌爽口。薄豬腩片配萵筍，豬腩片燒到甘香少少脆口。湯烏冬原來係一片嘅烏冬，人生第一次食，原來可以做到咁滑（因為我夾咗好多次都跣走咗）最後食埋個甜品，大滿足！