語命Cafe (Closed)

最近運氣唔係咁好，朋友介紹旺角有間樓上Cafe，可以一路食嘢一路占卜，咁今日出嚟食飯，就一於去算下最近運程啦。一去到，見到呢度雖然冇華麗嘅裝修，但係就有一種舒服同relax嘅感覺，好似喺屋企咁。咁我哋肚餓就梗係叫咗嘢食先啦，我就叫咗個煙三文魚意粉，一上枱見到佢擺得好靚，咁就梗係要相機食先啦。食落都好好味喎，估唔到賣相同味道都可以做得咁好呀。而朋友就叫咗個小食拼盤，有雞翼，炸蠔，炸魚柳，薯條等等。食落外脆內軟，好明顯係啱啱炸起㗎啦，而且蠔同魚都好新鮮，點埋個沙律醬簡直一百分呀。而呢嘅特飲都係好特別嘅，就有唔同嘅星座主題，咁我就叫咗個天秤座，朋友就叫咗個天蠍座。我呢杯天秤座係奶蓋朱古力味，飲落唔會太甜，朱古力味啱啱好，好推薦大家飲呀。呢間Cafe又好味又特別，價錢又唔貴，好似幫襯$200就可以玩一次塔羅牌，平平哋黎玩吓都好呀。