良記餐廳(老鳳冰室) (Closed)

原本諗住去食芋圓，點知未開，就過左嚟試下新嘢。1點鐘嚟食，唔使排隊。聽講黑松露多士最出名，但係我唔太鍾意食黑松露就無揀到。我揀左個老鳳雞翼撈一丁，聽落應該係招牌雞翼，加左啲芝麻粒同蔥，溝埋啲汁真係好回味，有啲不足之處係雞翼有啲生，入面有好多紅，朋友仔都話唔敢食。另外加左個雪糕紅豆冰，睇相好似唔錯就決定加$14試下，但係嗌既時候呀姨話要加$16。嚟到既時候好大杯，即刻試左粒雪糕，原來佢係雪米滋，兩粒係芝麻味，一粒係荔枝味，另外上面有好大舊cream，係幾新鮮既配搭，紅豆都好夠淋，成杯野好飲又好食，但係下次唔會再特別加錢去飲。另外，朋友仔叫左個芝士雞翼撈一丁，雞翼係炸既，入面就熟哂無血，有啲辣辣地，幾惹味，但係芝士撈丁有啲濟同埋無咩芝士味，朋友仔無食哂。佢就加左個波波奶茶，入面既冰係波波狀大大粒，係用奶茶去雪既，所以奶奶無被溝淡，成杯野好濃好好飲，篤爛個波波冰之後，啲冰碎都好好食，呢杯都係不二之選。成間鋪頭都好有特色，我諗普普通通叫個午餐都會好夠食好有香港味道，下次經過深水埗會試下其他美食