HOLA

Open Now

Now Closed

養狗後，已經幫襯過Hola好幾次。呢度地方算大，室內、外有唔少座位，就算係周六，嚟到都唔係好需要等位，咁樣帶住狗狗就比較方便啦~ 最近幾次嚟，我先知道原來狗狗可以入餐廳裡面坐，所以天氣熱時，狗狗都可以嘆下冷氣。呢度食物水準唔錯，嘢飲亦比較特別，加上價錢公道，所以我都幾鍾意嚟呢度食嘢。一個平日的中午，趁放假又同狗狗過嚟。雖然平日有特價午餐，但因為自己食素，所以最後就從餐牌點食物，揀咗素食全日早餐同埋一杯青瓜梳打(應該仲有青蘋果)。素食全日早餐好豐富，有炒蛋、大啡菇、蘑菇、蕃茄、粟米、沙律菜、茄汁豆，加埋一個香脆的迷你牛角酥！炒蛋幾滑，一碟有2種菇，令人滿足。碟上的食物本身唔需要太多調味，所以感覺好健康，而最好當然係我可以餵少少俾非常為食的狗狗啦！青瓜梳打好好味，又解渴。由侍應送上嚟時賣相一流，所以我見另一檯的單車客都望到實。以前我試過呢度其他口味的梳打，不過自己偏好清新啲，所以呢杯梳打甜甜哋又有青瓜味，好合心意。一個平日，可以hea住同狗狗食晏，感覺滿足，而我相信狗狗都係咁諗既，因為每次帶佢嚟到天空之城，只要行經Hola，佢就一枝箭咁標入餐廳架喇。