古早牛肉麵 (Closed)

去深水埗買完嘢行過見到間台灣嘢有麵線食，感覺香港嘅台式餐廳有好多但有麵線食嘅好似唔多，見好耐無食過麵線就入咗去食。睇餐廳店名以為係食牛肉都為主，睇完餐牌先知飲品選擇更多，比起台式外賣飲品店都唔輸蝕。七點入座幾乎座無虛席，我發現好幾枱客同我一樣都係自己嚟食，可能呢間餐廳係獨食之選綜合麵線（滷豬大腸+蚵仔）麵線賣相同係台灣食到嘅差唔多，味道濃淡都適中，麵線軟滑，入口即化。肥美蚵仔入口即溶，味道鮮甜唔腥。滷豬大腸十分肥美，係睇得出嘅邪惡感，滷水入味，入口即溶，整體都好食。冬瓜茶加愛玉我點咗少冰微糖，冬瓜茶味道清新解渴，夏天可消暑褪悶熱。愛玉份量十足，幾乎整杯都係愛玉，只係加4蚊就有好抵，愛玉入口爽滑彈牙，味道清爽，單點一杯行街飲都正。宜蘭迷你蔥肉餡餅食完麵線覺得唔夠喉，見隔離枱點嘅餡餅外皮煎到底面金黃色賣相相當吸引，於是我又點份嚟食下。餡餅外皮脆得嚟有啲煙韌，外皮香口，口感味道都似煎餃。餡料飽滿內餡充滿肉汁，當咬開外皮時裡面嘅肉汁會爆發出嚟，肉汁有蔥同高麗菜嘅甜味同肉餡嘅香味，即使餅皮煎到香脆肉汁可以補充返水份，令到餡餅食落唔dry，整體唔錯。