微辣大排檔 (Closed)

朋友問我識唔識微辣，我就反過來介紹佢微辣大排檔。呢度嘅裝修花咗唔少心思，唔同區域有唔同嘅佈置，主題都係環繞住澳門，嚟一轉就當自己衝出咗香港。餐具都甚有特色，茶壺夠晒正。首先揀個小食，懷舊蟹膏蝦多士熱辣辣又新鮮，蝦膠好彈牙，麵包又唔會太油膩。最正嘅就係配埋混有蟹籽嘅蟹膏，令蝦多士更加香口。金沙椒鹽魷魚份量勁多，而每片魷魚就比較薄身，食起上嚟更有口感。米酒雞上枱時仲有隻凶神惡煞嘅雞喺度怒啤住我。入面原來係用荷葉包住嘅原隻雞，店員會即場淋上燃點中嘅米酒，真係色香味俱全。雖然店員放咗鉸剪喺枱上，但其實鉸剪只係用嚟剪開荷葉，而入面嘅雞肉嫩滑得完全可以一夾即起。原隻雞入面仲釀入雲耳，入晒味好好食。發記大香腸係原條大香腸吊起嚟賣，然後店員就會幫我哋一一剪開。大腸頓時變成小腸，味道有啲似台式腸，甜甜地幾好味。椒絲腐乳通菜正常水準，腐乳味夠香，最緊要就係份量夠晒多，啱晒最鍾意營養均衡嘅我。