圍威喂 (荃灣廣場) (Closed)

喺荃灣廣場經過呢間新派泰菜，見裝修咁trendy ，座位又舒適決定入去試吓。餐牌有傳統泰菜同西泰fusion菜可以選擇，我哋就揀咗以下菜式：銀魚仔臘腸金柚沙律 $88 柚子嘅份量非常多，第一次同埋臘腸同銀魚一齊食出奇地夾，配埋泰式汁酸辣鹹香醒胃，絕對係一道開胃嘅頭盤。沙嗲牛柳串$48 2串 牛柳燒得剛好唔鞋口，軟腍多汁，配埋沙嗲汁一齊食，食完一串唔夠喉。黃咖喱蟹肉拼蒜蓉包 $188 泰式咖喱入面最鍾意係落蛋炒嘅黃咖喱，香濃滑溜有層次，蟹肉已經去曬殼，食落啖啖蟹肉，我地點晒四塊蒜蓉包都唔夠，另外再加咗碗白飯掃埋啲汁。是諗但泰式珍珠奶茶 $28 泰式奶茶通常偏甜，呢度調校得剛好，甜度適中亦保留到茶香，加配埋珍珠仲有多一重口感。值得一讚係呢度上菜嘅速度非常快，而且侍應服務亦都好好。見到隔離份是拉差醬燒豬肋骨伴黑松露薯條大大份好吸引，下次約多啲人一齊嚟試吓其他菜式先。