日喜樓 (Closed)

日喜樓，環境一流，菜式有驚喜嚟之前有做過功課，加上本身中意食羊，所以二話不說就order咗「京燒羊」。一上臺，已經知道呢碟羊一定好食。肥瘦相間，表皮燒到卜卜脆，加埋孜然調味，正！件羊放落口係略帶燒烤香氣息，但又會唔蓋咗陣肉香味，真係忍唔住嗌咗完白飯嚟送。講明先，係有少少羶味，但中意食羊嘅人唔單止唔討厭，仲好中意！份量細細地，2-3人食啱啱好。另外order咗水煮魚，一嚟中意食辣，一嚟知道屋企整唔到嘛，一於嚟試下大廚手勢！好彩之前嗌定白飯，因為水煮魚真係超級下飯。有油香、魚鮮味、芽菜嘅爽口……一路流完汗一路食，三兩下已經食完。食咗咁多重口味嘢，不忘嗌多個蔬菜，清清腸胃。上湯浸菜食得多，呢到嘅做法係將茶樹菇切碎，同金菇、炸蒜放埋一齊，淋上上湯。清口之餘，啖啖都食到菇類嘅香濃，同翡翠苗嘅清香。食素嘅朋友一定都唔會失望！最後食埋個牛肉馅餅，佢係即叫即整，所以外皮酥脆，內裡鬆軟。唔食甜品食件馅餅都係完美ending，好滿足。因為胃納不太，淨係嗌咗以上菜式。下次有機會，好想試埋佢地嘅小菜同埋片皮鴨。