新潮樓 (Closed)

之前去九龍灣國際展覽中心都係睇下show，估唔到EMAX都有間中菜係幾高質，環境好闊落舒適，食物多選擇，上菜速度快，食物熱辣辣夠新鮮，員工親切有禮，斟茶執碟所有野都好細心。唔好以為EMAX好隔涉，其實係九龍灣站轉shuttle bus都勁快，同屋企人黎食絕對合適。叫左個精選套餐4人份量，首先黎到既係瑤柱海皇羹，夠熱，味道唔太咸，有勁多蝦仁同埋瑤柱，絕對比貨冇取巧。之後係潮州滷水鵝拼盤，有鵝肉、滷水豬腸、紅腸、墨魚同豬腩肉，潮州特色夠入味同好好食。碧綠川淑蝦球食落好香口，蝦球好爽口彈牙，味道有啲似燒烤醬味，幾特別。潮汕梅膏骨類似金沙骨咁，酸酸甜甜，五花腩都幾多肉，小小肥令到d肉好juicy，但又唔會成口油，岩食。招牌吊燒雞果然係招牌菜，雞皮薄香脆，雞肉好滑，仲有淮鹽吊下味，十分出色。最後就係薑汁方魚芥蘭，芥蘭配薑汁可以減低個苦味，仲有方魚幾特別，有啲似柴魚。糖水係紫米露作結。現場仲有live band show ，仲可以點歌，有新歌又有舊歌真係啱晒唔同年齡層，成個用餐氣氛好好，佢個地點好似好遠但其實都幾方便，價錢都唔係好貴。