泰道 (Closed)

喺西貢玩完kayak🛶，又成身濕住又肚餓，唔想返市區食，就搵咗間附近嘅餐廳食。呢間餐廳位置上離西貢市中心比較遠，而餐廳亦都安排咗好多停車位，比揸車人士可以去泊🅿️。所以對於我哋揸車嘅人來講🚙，都算係非常之方便。雖然離市中心比較遠，但係唔代表餐廳冇乜人，我哋五點幾去到，都已經冇晒望海景嘅和室外位，只有入少少嘅一張室外位。雖然係室外，但係由於餐廳提供好多風扇💨，所以一啲都唔覺得熱。🥵餐廳對住嘅海景係其中一個賣點，日落時分去，景色十分怡人🌅。嘢食方面，我哋叫咗三味餸。首先，泰式炒雜菜普普通通🥬，唔係唔好食，只係冇乜特別。之後我哋再叫咗椰子雞湯同埋青咖喱雞，兩樣嘢都非常之好味😋。椰子雞湯充滿咗椰子嘅香味🥥，而中間亦都加咗少少嘅辣味，令到咁重椰子味嘅湯都唔會太濟。另外，青咖喱雞就一啲都唔辣🌶，加埋個薄餅去點，香口嘅咖喱味襯托住鬆軟嘅薄餅，令人一試難忘。🤤雖然價錢真係偏貴💰💰，但係咁嘅環境，咁嘅食物質素，都算係值回票價，值得一試。⭐️⭐️題外話，呢間野服務就差咗少少，我哋其實仲叫咗個明爐魚，等咗半個鐘，我哋問過女侍應，佢話會跟跟，點知過多左15分鐘，我哋再問個高級啲嘅侍應，佢再幫我地睇，原來根本都冇落單