堅離地 7 PO (Closed)

餐廳佈置幾靚，幾盞彩色玻璃吊燈好有異國風情，入座見到桌上張迷你地毯墊都覺得好靚（但唔知係咪每次翻枱都有清洗或替換）墨西哥牛肉芝士餡餅 $98 正喎，餡料夠多又均勻，塊皮微脆，咬落啖啖芝士都可以拉絲，正！覺得太邪惡可以點埋個酸乳酪無咁膩。秋葵燴羊肉配中東皮塔餅 $136 羊肉有少少羊羶味又夠腍，正。配料除左秋葵，仲有蕃茄，薯仔等，有少少食緊肉醬既感覺。皮塔餅唔係香脆果種，食落有少少煙韌。乳酪黃咖哩雞配中東香草飯 $146 咖哩微辣，乳酪醬撈匀中和返，整體都幾香濃，雞肉及配料都幾多，但配料就同羊肉差唔多。原本上餐黎錯左皮塔餅，同店員講，佢拎入去同廚房講，之後等左成20分鐘都未上個飯，其實成間餐廳都無十張枱，店員完全唔記得未出個飯漏左單或者無留意成碟咖哩雞未郁過…催單之後店員先跟進，但一句唔好意思都無講，真係有改善空間。中東飯一粒粒乾身長形米，加入香草睇到但嗒唔出，不過撈汁唔錯。.跟餐配熱飲或加$6轉凍飲，柚子蜜正正常。.整體食物質素其實唔錯，平時比較少食中東菜或土耳其菜，唔知點解三款食物都有酸乳酪，但我幾鍾意。原本想試去骨燒春雞，但賣晒就轉咖哩雞，食完覺得咖哩雞同燴羊肉有點似。