Fjaka (Closed)

臨近聖誕，朋友帶我嚟試吓呢間Fjaka，真係冇介紹錯。入去之前， Staff俾我哋揀坐入面定Balcony。因為落雨，所以揀咗坐入面。入到去發現佢嘅裝修好特別好chill，座位非常舒服，真係好啱一邊食嘢飲酒，一邊傾偈。意式腸拼盤配楓糖芥末醬一共有5至6款腸。辣肉腸好惹味，脆皮腸都好香口，有骨嗰隻腸好juicy。好中意佢配嘅楓糖芥末醬，同啲腸好夾，好開胃。紀之川海膽吐司每件吐司都有一朵花點綴，賣相超靚，用嚟打卡真係一流。海膽好新鮮，麵包上有少少醬，令佢冇咁乾，三樣一齊食，真係好夾，好好食。鮮海膽意大利粉配茴香泡沫菜式好特別，賣相都好靚。海膽照樣好鮮甜。我哋將茴香泡沫同意粉撈埋一齊食。意粉食落好香口，軟硬度適中，唔會好似其他好多稠汁嘅意粉咁食到人好滯。Happy Hour至八點前嘢飲買一送一，真係好抵。我哋試咗幾款果汁。個人最中意蘋果汁，清清地唔會太甜，同啲嘢食都好夾。臨走前見到balcony嗰景真係好靚，希望下次好天嗰陣可以坐出面食好嘢影靚相啦。