京滬佳餚 (The LOHAS康城) (Closed)

將軍澳康城站開咗個好大嘅商場，上次去行都行唔曬，商場新開咗好多食店。好想去試新餐廳，今日同老公再去逛下。途中見到有間京菜餐廳，叫京滬佳餚，餐廳主打新派摩登京滬菜，佔地4000呎，裝潢有中國宮廷格調，設有露天用餐區。京滬酥香烤鴨半隻 ：師傅精選北京金星填鴨，採用西式的蒸烤風爐燜烤製作填鴨，利用科技有效控制爐溫，令烤鴨酥而不膩。鴨皮燒得均勻又香脆，脂肪部份唔多，食起上嚟唔會覺得肥膩，至於鴨肉亦嫩滑，肉味非常香濃。食片皮鴨嘅配料有六款：糖、甜醬、京蔥、青瓜、蘿蔔同蒜蓉，配搭起上嚟好有層次。餅皮做得夠薄，煙韌有彈性，大廚功夫真了得！夾埋所有材料，能品嚐到鴨皮的豐腴油脂，令人齒頰留香。招牌小籠包：小籠包皮薄餡多，包內充滿濃郁嘅肉汁，好好味！京滬擔擔麵：湯入面有豬肉碎同蔥花。麵條係自家製，特別幼滑，湯底濃郁有麻醬香味。鱔糊炒麵：炒麵足料有鑊氣，鱔大條又粗，好有咬口，加入芽菜和韭黃增添爽口感，味道甜甜地好好味！抽子冰茶：用茉莉花茶、熱情果醬汁、檸檬汁、柚子蜜、桃泥調製，味道清新，甜甜地，冰凍好飲！禁果：用柑橘、卡爾瓦多斯酒、檸檬汁、蛋白和糖漿調製，有滑的口感，酒味不濃！