La Maison du Chocolat (Closed)

週六中午時份於銅鑼灣逛街，碰巧遇上契媽，見距離午飯時間尚有成個鐘，我地就決定入去利園搵個地方坐低飲杯野，聯繫一吓感情。正當小肥四周喺度搵緊個水牌時，契媽已經指出商場下層中央好似有間咖啡店，二話不說更落埋去探個究竟。原來大堂中央o既散座係側旁間法國朱古力店「La Maison du Chocolat」提供，地方光亮簡潔，感覺都好衛生。由於梳化櫈較矮，所以我地最終選擇咗坐較高身o既四人方形餐桌，舒適闊落啲。當日店舖有兩位美少女助陣，長髮姐姐面相較兇，唔多好惹，短髮姐姐則不但樣子清純友善，而且仲好有耐性地為我地續一介紹不同飲品o既特色，細心又有禮（嘻嘻，下圖可見契媽及短髮美少女之背影）。食客可享用店內各色各樣o既朱古力甜品及飲料，不過因為好快就到食晏時候，我兩結果都只係每人叫咗杯涷朱古力飲就算。Cold Chocolate Caracas（$69）：杯涷朱古力就好似短髮美少女推介咁香濃醇厚，口中o既甜絲絲猶如跟情人正在談戀愛般，每喝下一口，臉上都會自然流露出笑顏！如此美味，$69卻只有一細杯，莫非法國名牌子就不能慷慨點嗎？！