唐宮小聚 (The L. Place)

Open Now

Now Closed

今日公司老闆生日，安排嚟呢度食餐新潮中餐先。呢度地方好大，午飯時間真係好多人呀，唔訂位嘅晏啲上嚟，應該都唔洗等位。點菜內容我唔太清楚，所以都係憑記憶架咋。醉蟹蟹個樣有啲似大閘蟹，唔理啦，酒香而不嗆口，蟹肉入晒味呀。乳鴿皮脆肉嫩，仲好豬士添架$25一隻，枱枱都會叫，怕污糟記得叫侍應比手套，環保啲都係用手啦。呢件炸物，新鮮即炸，香脆無比，入面有啲芝士同唔知乜，都幾好食。水煮魚，我好怕辣，都食咗兩塊，魚唔算正宗嘅咁大塊，不過都好滑，麻同辣期實都唔太強嘅，入面仲有啲薯粉，食得辣嘅一定會食埋。蟹粉豆苗，豆苗好鮮嫩，但係蟹粉就冇咩蟹味喇。炸魷魚鬚，普普通通冇咩特別。欖角四季豆，都係平平穩穩啦。松露鮑魚飯，松露嘅香包住每一啖飯，鮑魚得一隻由壽星公食咗啦。韓國年糕，有啲魚同蝦，醬汁酸酸甜甜，魚都係偏細，蝦就一般啫。今次第一次試，感覺侍應好似啱啱入職冇幾耐，轉數唔夠。叫沖茶，應完又唔記得，冇咗件事。叫攞牙櫼，情況一樣。叫埋單又冇事喎。最後係希望佢地，安排坐位時要增加經驗。我地等位時，見到有兩個人坐4人枱，我地6個人都係坐4人枱，餐點上枱時一次過嚟，真係冇咁多位放，同埋影相架。