Video
Read full review
2015-09-04
3271 views
領隊話因為獅子銀行信用卡做Promo，有一個四人套餐做六折，又話生日食豪D都唔怕，試得過。領隊幫手提早BOOK位，頭圍原來要八點交枱，我地咁耐無見要傾計，當然要八點先入場，傾到打烊先夠本。北京樓二小拼 (杭州芳香素腐方、七里莊酒糟醉雞)。前菜有兩小碟凍盆，素腐方即係腐皮素雞咁，用上魯汁，甜甜地幾入味。醉雞都幾滑，酒香唔錯。金湯瑤柱花膠海皇羹非常好味，勁足料，有瑤柱、花膠粒、仲有蝦、魚肉等。湯本身味道好夠濃，仲啖啖有餸，可惜無得飲多碗。京爆明蝦球。蝦球沾左炸粉略為炸過，幸好粉漿唔算厚，炸左仲脆脆地。蝦味就無乜架啦，但質地好彈牙爽口，加左京爆醬，似係咕嚕醬，酸酸甜甜少少辣，醋味都幾濃，真係俾佢「俗」親添。烤北京填鴨。烤呢隻鴨要預四十五分鐘，所以都等左一陣。烤好後服務員會送上原隻全相俾你睇，之後就拎到櫃台再分屍，送到上枱已經變成一塊塊。雖然只係一食，鴨殼嘅肉唔關我地事，但淨係食皮肉份量都唔少。食嘅時候用一塊薄餅包住，加兩塊肉，加醬汁，再加蔥或者青瓜包好就食得。幾欣賞佢薄餅同鴨都仲係熱辣辣，鴨肉唔算肥，都幾腍幾多汁，唔錯。事後發覺，呢份野實在太大，隔離枱八個人都係食一客，我地四丁友食唔晒好正常
領隊話因為獅子銀行信用卡做Promo，有一個四人套餐做六折，又話生日食豪D都唔怕，試得過。
領隊幫手提早BOOK位，頭圍原來要八點交枱，我地咁耐無見要傾計，當然要八點先入場，傾到打烊先夠本。
北京樓二小拼 (杭州芳香素腐方、七里莊酒糟醉雞)。前菜有兩小碟凍盆，素腐方即係腐皮素雞咁，用上魯汁，甜甜地幾入味。醉雞都幾滑，酒香唔錯。
金湯瑤柱花膠海皇羹非常好味，勁足料，有瑤柱、花膠粒、仲有蝦、魚肉等。湯本身味道好夠濃，仲啖啖有餸，可惜無得飲多碗。
京爆明蝦球。蝦球沾左炸粉略為炸過，幸好粉漿唔算厚，炸左仲脆脆地。蝦味就無乜架啦，但質地好彈牙爽口，加左京爆醬，似係咕嚕醬，酸酸甜甜少少辣，醋味都幾濃，真係俾佢「俗」親添。
烤北京填鴨。烤呢隻鴨要預四十五分鐘，所以都等左一陣。烤好後服務員會送上原隻全相俾你睇，之後就拎到櫃台再分屍，送到上枱已經變成一塊塊。雖然只係一食，鴨殼嘅肉唔關我地事，但淨係食皮肉份量都唔少。食嘅時候用一塊薄餅包住，加兩塊肉，加醬汁，再加蔥或者青瓜包好就食得。幾欣賞佢薄餅同鴨都仲係熱辣辣，鴨肉唔算肥，都幾腍幾多汁，唔錯。事後發覺，呢份野實在太大，隔離枱八個人都係食一客，我地四丁友食唔晒好正常，惟有打包。返到屋企叮番熱都仲OK喎!
上湯浸時菜。應該係溫室豆苗，其實算整得唔錯。但個人唔太鍾意呢種菜有陣草腥味。
無錫灌湯小籠包算OK啦。包皮都算薄，係個包頂接口位包得太厚，肉餡都幾多，肉汁都算多，可以倒滿一個湯匙，湯汁呈深黃色，味道都幾鮮甜。
香糟蔣腿蒸黃魚。睇名除左知道佢係一條黃魚，真係估唔到會咁樣上菜，造型都唔錯。原來佢條魚切開幾段，將冬菇、金華火腿、筍片夾入中間拎去蒸，所以造型都幾特別。少試一啖，魚肉幾入味，肉質OK啦。
兩舊迷你冰皮月餅，應該係最基本綠豆餡，但係太飽無食到。
以上咁多樣都係四人套餐包嘅野，其實份量都好多，我地四丁友真係食唔晒，分分鐘五、六個人食都仲得。其實唔理佢係唔係六折啦，都算唔錯呀，真係食得好飽。所以話，有時套餐都幾抵食。得閒要留意下信用卡嘅Promo，有驚喜呢。
Post
