Starry Night (Closed)

我同朋友一向都好鐘意食生蠔，上網見到呢間係銅鑼灣既生蠔放題吧，只係每位$468就可以任食生蠔2個鐘，緊係要即刻book黎試下佢。上到餐廳七點幾，已經見到差唔多full house，大家黎之前一定記住要book位。餐廳裝修方面，見到壁畫同燈光都充滿住宇宙星球既主題，感覺幾得意。一坐低，好快就上前菜，有黑糖包，忌廉湯，味付螺肉、日式中華沙律同埋日式芝麻八爪魚。主菜方面三揀一，包括紐西蘭羊架、西冷牛扒同埋Carbonara。我哋揀咗羊架同埋牛扒。羊架同牛扒都啱唔錯，羊架肉質鮮嫩，有我最鐘意既羊羶味。牛扒大大塊，Juicy有肉汁，熟度啱啱好，仲配埋熱辣辣新鮮炸起既薯角。終於到今餐飯既主角，生蠔！生蠔有分日本同埋法國兩種，兩種都好肥美鮮甜，海水味重，加埋檸檬汁同辣醬令鮮味更加特出。另外仲有翡翠螺同凍蝦，同樣非常新鮮。另外值得一讚既係店員會自動自覺幫手清走生蠔殼同換碟，見我哋食完第一盤，亦會好快就幫我哋上第二盤。