蘭度小籠包 (Closed)

約咗朋友食飯，佢喺灣仔返工，點知撞正OT，於是去咗灣仔接佢放工順便喺嗰頭食飯，行過蘭杜街見到呢間蘭度小籠包，就入咗去。由於好肚餓嘅關係，所以我哋兩個人都嗌咗好多嘢食。首先係上海粗炒，好鬼大碟，每條面都Jim滿汁，而且好夠鑊氣，yam埋豆瓣醬，勁惹味！然後必食嘅小籠包，一上菜店員已經話呢度嘅小籠包好正，講到咁勁就試吓啦，果然係皮又薄又滑，豬肉又Juicy又有肉味,湯汁亦都好鮮甜，唔使點醋都好好食！香口推介有牛肉餅，個包好香脆，唔會硬骨骨，牛肉質感亦都啱啱好，夠Juicy!再嚟係紅燒獅子頭，其實我食上海菜好少叫佢，因為好難整得好食，一係太實一係太散，但係朋友想試，所以叫咗，結果又出乎意料地好食，唔會太實唔會太散，個汁濃杰適中！最後叫咗個鹹肉津白，上湯本身已經好鮮甜，鹹肉令個味道更加有層次！食咗五樣嘢，每人只係$150 ，性價比極高，推介大家嚟試吓！