道北工房 (Moved) New Location

今晚又俾我喺天后搵到間新餐廳'道北工房'，我初初以為係一間日本料理餐廳，直到坐低打開menu先知，係一間多國菜餐廳，日本嘅刺身鍋物，意粉生蠔，就連煲仔飯都有得食。魚缸仲放咗唔同喺日本直送嘅活海鮮。海魚刺身又大條又新鮮，魚眼非常通透。鋪內仲有風乾牛肉，醃咗嘅雞，新年仲有蘿蔔糕可以買返屋企，自己煮。仲有季節限定特別餐牌冷盤就叫咗虎蝦芥辣醬蟹籽牛油果，淡淡嘅芥辣帶微辛味，可以將味道較寡嘅牛油果味，變得更有層次。虎蝦爽口彈牙，同牛油果有強烈對比，好開胃嘅一道菜。蝦多士我食得多，成隻大虎蝦喺塊多士上面就真係第一次，多士焗到外脆內軟，牛油蒜蓉加蟹肉絲，加埋沙律醬，食得出廚房係用心去做。超級推介呢個鵝肝煲仔飯，打開蓋聞到香噴噴嘅鵝肝味已經好開心，仲見到3塊超厚嘅鵝肝，真係好正，睇完一陣店員就將雞蛋，蔥花，芫茜，放落煲仔撈起。每啖都食到脆脆嘅飯焦，雞蛋嘅滑，鵝肝嘅油香，蔥花同芫荽嘅清新配合得好出色，鍾意食鵝肝嘅朋友一定要試。