順景食店

Open Now

Now Closed

今次係第二次嚟食，相隔上一次已經成年前，第一次冇影相冇寫食評。因為住新界既關係，相對嚟呢度食飯比較遠，但為左呢個牛腩煲我覺得遠d都值得。呢間係熟食市場既舖頭，好岩我口味，湯好清甜，處理食材既方法亦都好好。清湯牛腩鍋牛腩岩岩上枱既時候，牛腩未完全夠身，仲有少少咬口，牛腩鍋入面仲有牛蹄筋，牛骨，牛脆骨，牛毛肚，雖然每樣只係少少，另外有白蘿蔔，粟米，食材簡單，但係處理得好唔容易，因為每樣食物炆煮至軟淋既時間唔同，所以食得出係用心製作，個湯好清，食完之後唔會口渴，份量亦都好多，佢同果d出名既清湯腩舖頭比較，真係一d都唔失色。慢火煲住咁食，d食物越煲越淋超正！上湯浸豬膶粉腸豬膶夠厚，粉腸夠淋身，湯飲落同牛腩煲有少少唔同，豬膶好爽食落口感覺好正，比果d做豬膶粉麵既餐廳做得更好。未有機會試佢其他食材，望到鯪魚球，上湯浸雞，蒸雞，手切牛肉，好多枱都有叫，呢間舖如果鐘意食牛肉真係好大機會再幫襯。酒水又唔貴，見好多熟客都有帶紅白酒上去飲。