Crazy King Restaurant and Bar (Closed)

同大學同學聚舊，今次朋友推介就試左crazy king 👑 餐廳嘅裝修都幾新，坐得幾舒服。同埋餐廳好在唔會趕客翻枱，幾適合我地三個女仔傾計聚會。今次就揀左個二人餐，加多個肉類主食。頭盤係烤水晶包，水晶包烤到脆卜卜，有蕃茄醬，青醬同橄欖油點住食。包本身有少少咸味，個人覺得加左番茄醬開胃啲，個擺設都好適合打卡。燒日本鱈魚乾，燒得唔會太冧，少少脆。自家製青瓜汁野菜沙律，本身見到綠色嘅醬以為係青醬，原來係青瓜汁，幾refreshing，沙律都夠新鮮。個餐湯拉花有心思，味道就不過不失。主食有三個，其中一個係四川麻辣雞肉大通粉。四川麻辣同意粉又意外地夾，微辣，值得試試。西西里汁焗時令海魚扒，西西里汁係蕃茄為主，魚扒都幾滑。肉類就有廚師精選二重奏，有豬手，薯蓉同Parma ham 包住豬肉，Parma ham包豬肉睇得出係心機之作，薯蓉都整得幾creamy，今次餐飯最欣賞個二重奏。