吾子廚房 (Closed)

一直想試佢地嘅甜品，可惜趕唔切去PMQ店，好彩最近佢地喺西環重開。店內嘅裝修好有日本家庭小店嘅感覺，門口有個小庭園，上層有榻榻米，加埋簡約嘅木系餐具，有去左日本旅行嘅錯覺。店員態度親切有禮，喺唔少細節位睇到個個都好用心(第一次見到人咁認真消毒餐枱，潔癖患者非常欣賞)。店內座位唔多，有興趣到訪記得提早預約。🍽月見浮雲親子丼最近幾乎日日喺ig見到嘅名物，賣相同佢嘅名好匹配，浮雲就係質感好似泡沫咁輕盈嘅蛋白，而明月當然係中間嘅蛋黃，炒飯粒粒裹滿鰹魚汁，內有嫩滑嘅鹽麴醃雞柳，仲配味噌湯、粉香嘅凍南瓜塊同青提，前菜同飯後甜點都照顧周到。🍽焙茶覆盆子魔法蛋糕原本想試無花果蛋糕，可惜已換餐牌，就試試新品。焙茶同覆盆子呢個配搭幾新穎，茶味濃淡適中，奶油打得好輕盈，質感粉粉地有啲似羊羹嗰種膠著嘅感覺，後來店員同我地講魔法蛋糕其實係布甸，雖然幾特別但我都係鍾意普通蛋糕多啲。🍽牛乳富士山奶酪上枱時震騰騰，望住佢心情莫名會變好呢～奶酪滑溜，奶味非常香濃，無論賣相定味道都令人驚喜。☕️Matcha Latte/ Cappuccino睇顏色偏啞似唔似係小山園茶粉，可能係靜岡抹茶(？)，總之係好飲嘅。飲到尾都無粉粒感