睿海御宴 (Closed)

大坑出名多高質食肆，今次到訪嘅睿海御宴係一間樓上私房菜，地點就腳，過咗銅鑼灣道嗰個安全島再行幾步就到，而且門面搶眼，有中式牌匾，上樓嘅樓梯仲有舞火龍壁畫，好有特色。私房菜通常價錢不菲，但呢度就豐儉由人，第一次嚟小試牛刀食佢嘅$488套餐，有半隻雞再加兩個小菜，幾抵食👍🏻雞可以揀花雕雞或炸子雞，鍾意食脆皮嘅我地二話不說揀咗後者，真係皮脆肉嫩，最得意嘅係會配埋炸蝦片，味道同樣出色～小菜方面我地揀咗咕嚕肉同肉鬆四季豆，兩者都好有鑊氣，四季豆辣度啱啱好～見佢套餐咁好食我地都再加咗湯同個蠔餅，蠔餅嘅蠔量多得驚人，配埋特調醬汁，微酸嘅味道更加帶出蠔肉鮮味，仲有醃蘿白絲十分解膩。湯品係逐位上嘅，以茶壺盛載別具特色，猴頭菇燉雞味道香濃，小杯咁飲保溫效果更好，仲可以隔埋渣🤣🤣主菜湯品固然係好食，但成餐飯最驚喜係一開始嘅開胃小食，望落好樸實嘅涼拌青瓜非常爽脆，而且醬汁比起平時坊間食到嘅更好味，令人眼前一亮～