Homeland (東昌街) (Closed)

餐廳地方闊落，有上下兩層。店舖嘅裝修比較俏皮，門口用彩色嘅霓虹燈做招牌，店內充滿色彩繽紛既掛畫、木製桌椅等，燈光偏向昏暗，氣氛唔錯。Set Dinner ($148)分別有前菜 (湯/沙律)、主菜同飲品。前菜我地揀左煙三文魚同慢煮雞胸凱撒沙律，煙三文魚同雞胸都好足料，配上濃郁嘅凱撒醬同新鮮沙律菜，十分清新。伊比利亞豬肩肉配蘋果蓉及薯菜揀左8成熟 ，慢煮製作，豬肩十分厚身，食落肉質夠軟腍，一啲都唔鞋口，肉味香濃好juicy。配埋蘋果蓉醬汁，酸酸甜甜好夾。伴碟既薯蓉亦算出色，薯蓉滑身，中間仲有一粒粒嘅薯塊，令口感更豐富。黑松露牛肝菌芝士薄餅表面有滿滿既芝士同牛肝菌，黑松露好香濃，批底又夠薄夠脆口，令人忍唔住食多幾舊。蒜香辣椒炒活蜆 (+$58)蜆肉飽滿，爽口彈牙，小食分量黎講都唔少，味道帶有小小辣，幾惹味。爆炸糖玫瑰荔枝梳打 (跟餐飲品半價升級)除左預先放入飲品既爆炸糖，另外仲會跟多一包俾你邊食邊飲/慢慢倒落去飲，幾特別，仲有淡淡玫瑰花香同荔枝味。青檸水果梳打多多充滿青檸嘅清香，入口清新，飲落微酸有汽幾開胃，又可以平衡反食物既油膩感。