順景食店

Open Now

Now Closed

由以前係街嘅地舖，食到搬過黎熟食中心，真係真心由細食到大嘅牛腩店。老闆一家三口都會係鋪頭幫手，老闆娘都認得我地，去到都會打聲招呼。平時會有牛腩粉食，今次我地一家人去食夜晚嘅牛腩煲，記住要訂架！首先有滑雞，因為大家太肚餓冇影到相，不過真係超滑！湯都係牛腩湯底，飲埋都唔怕。另一味雞係蒸雞，有蟲草花、紅棗，味道濃過滑雞，個人就鍾意哩個多d。食完雞就到重頭戲 - 牛腩煲啦！我地多人叫左兩個大牛腩煲，未叫火鍋料，本身個煲入面已經有粟米、牛腩、白蘿蔔，仲附送一籃生菜。滾起左飲啖湯先！好味好味好味！飲落好舒服，會好想繼續飲，唔會好重味精味，牛腩就要滾耐d先淋。每次必叫嘅料有豬潤同粉腸，兩個都係超大舊，豬潤可以淥到啱啱好，夠厚身。今次咁啱冇晒粉腸，下次再叫。到粉麵，又冇我地平時叫開嘅河粉，不過！老闆介紹我地試米粉，竟然！好味過河粉！米粉質地係有咬口，一d都唔淋，加埋入味嘅蘿蔔，仲要冇渣架，正。