新光粥店 (Closed)

住在佐敦三十多年, 由細食到大, 一間家族經營的粥店。伙計永遠第一時間問你食乜(都未坐低), 你話睇下先(咁你就後悔, 佢會走左去費事理你)。看著它的轉變, 由無冷氣到有冷氣; 以前逢過年都休息兩星期改為數天, 一個個老伙記退休, 由無飲品做到有汽水賣, 再加炒麵(多數未有)&蘿蔔糕。但最大的轉變係, 以前會落好多味精, 食完口喝到暈, 而家就淡而無味; 以前牛仔(碎牛粥)會『杰撻撻』, 而家就『稀淋淋』無乜材料, 油器以前有個爐頭於街邊不停有出品, 而家就休想啦, 炸腸例必唔脆, 腸粉一定凍冰冰, 真係廉署個廣告咁話, 而家食唔到啦, 以前就有！冷氣係有, 但係唔凍, 門口又無風閘阻冷氣外泄, 又唔開風扇, 夏天例必食到流汗。論好食, 佢一定無份, 論抵食? 碗粥少料, 抵食又無佢份? 論衛生又點?試過朝早上班, 要一碗荔灣(艇仔粥), 一條油炸鬼。粥先來, 食緊, 眼角見到佢用手『丁』條油炸鬼上碟, 用手『丁』無所謂, 有所謂係咁橋條油炸鬼跌落地, 正正在小弟腳邊, 我又望下個伙記(哨哨地牙果位), 佢又望下我; 我諗你唔係想俾呢一條我? 結果佢真係…無俾到我, 佢拎過第二條俾我。