蘭英印尼小食 (Closed)

呢間小店係九龍城已經開咗十六年，咁多年賣嘅食物都冇變過，一到午餐時間就會有好多學生跑過來買飯盒買串燒。呢班學生好多都食到變大學生，變到出嚟做嘢，我就係其中一個。好多人睇招牌以為蘭英只係賣串燒，其實佢哋都有賣黃薑飯，咁多年來都只有兩款，一款係串燒黃薑飯，另一款就係雞脾黃薑飯。今次我就揀咗雞脾黃薑飯。雞脾燒得剛剛好，好嫩滑。黃薑飯粒粒分明，份量都非常多。呢度係冇位坐，只可外賣或者係旁邊立食。記得叫老闆娘俾多啲沙嗲醬，如果唔係好易食哂雞脾同醬之後淨返好多飯。佢哋嘅沙嗲醬非常濃，裡面混合咗花生碎，配埋黃薑飯一齊食，一流👍🏻👍🏻咁多年嚟加咗唔少價，不過佢真係keep得到好個水準廿年來味道如一😋😋😋，知道蘭英就快要結束好唔捨得，趁依家仲有機會要快啲去試！