快靚正燒味粉麵茶餐廳 (Closed)

陪老爸逛深水埗北河街買電話卡， 先知道原來電話卡係可以 有咁多花款同埋咁平。唔覺唔覺行到黃昏， 不如食個早飯，對身體都健康啲。一見到呢個門面，老爸就話食燒味， 呢間舖頭好大有兩邊舖， 入到去姐姐就話茶餐廳嗰邊涼啲, 於是我哋就去咗左邊嗰間鋪坐低。深水埗畀我感覺都係老人家多, 感覺係殘舊的， 但當我坐低咗發覺四周都異常乾淨，最出奇係有 網上外賣平台紙袋， 果然好新潮。食好啲， 老爸叫咗燒鵝髀飯，我叫咗乳豬三寶飯，就送來一碗例水， 呢碗湯真係好住家，完全冇味精，讚。開飯喇， 一人一碟碟頭飯，$ 65蚊一大碟， 份量超級多，好好食…… 我啲乳豬超脆， 燒鵝好香， 仲有油雞都好滑， 值得一提嘅係年青老闆重過嚟同我哋傾下計， 佢有介紹佢哋舖頭自設燒爐， 絕對唔係來貨加工， 食物質素衛生有保證 。 佢亦都會問下食客意見，員工招呼都好好， 燒味界來講真係好有heart。由於燒味太好食， 於是買咗燒腩同叉燒返去宵夜。 所以差唔多全部燒味都食勻曬， 誠意推介燒腩。