金田家 (Closed)

同姊妹去荃新天地行街，行到攰攰地就隨意走左入呢間金田家度食拉麵。餐廳裝修別緻用心帶有日本風味，特別喜歡天花板上掛滿嘅波波燈，又靚又實用。餐牌厚厚一本圖文並茂，十分清晰。辛子黑蒜拉麵 ($88) - 湯底黑蒜油味十分香濃，除咗腩肉叉燒之外仲有木耳同紫菜，腩肉叉燒腍滑，食到豚肉嘅鮮味，麵身幼滑彈牙，配上爽口嘅木耳及香口嘅紫菜，豐富又好食！柚子辛口拉麵 ($98) - 豬骨湯底十分濃郁，紅蔥粒帶有清新嘅柚子味，配上幾片叉燒，香口辣椒醬及爽甜芽菜，別有一番風味！我哋追加咗幾樣配菜同拉麵一齊食:溏心蛋 ($14) - 蛋黄流心，蛋白柔軟彈牙， 蛋味香濃。黑豚叉燒 ($33) - 有4片薄身大大片，夠腍滑，味道唔錯。木耳 ($7) - 份量足，十分爽口，加入拉麵份外滋味。另外仲點咗個小食，鹽燒鯖魚 ($46) - 肉質實淨juicy，帶有魚油香味，燒得香口好食。蘋果汁 / 橙汁 ($18/杯) - 天氣乾燥，飲返杯果汁補充下維他命就最適合。餐廳環境闊落，坐得好舒服，我哋就係咁食下嘢，休息下再重新出發！