洪師父牛肉麵 (Closed)

疫情下都好少出街食飯，星期六放咗工，真係唔想咁早返屋企，成日都經過洪師傅，見當時舖內客人又唔多，所以就入去試試佢。我就叫咗川味牛肉麵，湯清得嚟充滿牛香，肉方面係用牛肋條，食落彈牙唔靭，牛油香十足，麵質煙靭彈牙，湯浸耐咗都唔會糊同爛。川味方面目測有啲啲辣油，不過川味一啲都唔突出。碗麵嚟嘅時候好似唔太大碗，不過食落材料十足，相當夠飽。大佬就叫咗滷肉飯鹽酥雞、滷肉唔係肉碎級，而係好細嘅肉粒，肥膏同肉比例適中，配上香濃醬汁，送飯真係一流。飯面仲有菜脯、醃菜絲、醃蘿蔔同滷水蛋，淨係碗飯都夠飽。鹽酥雞唔係一粒粒，而係鹽酥雞扒，一件件，咸香脆，唔會炸到乾爭爭，肉汁充裕。跟餐嘅阿薩姆紅茶，菜清新幽香，已經叫咗少甜都略嫌甜咗啲。少甜少奶嘅珍珠奶茶，就一般貨色，茶味都算香。兩杯飲品都好大杯。環境都坐得好舒服，我哋坐近廚房出菜位，望到廚房裡面都好乾淨整齊，令人喺咁嘅疫情環境下都食得安心。