翠園 (銅鑼灣廣場) (Closed)

同鍾意食嘢嘅朋友去食飯有一樣好，就係大家都會鍾意去唔同嘅地方，嘗試新嘅菜式。今次我哋揀咗翠園。一開始點菜，都真係幾激氣，雖然我都明白因為疫情關係，餐廳冇可能準備咁多材料，所以好多嘢都應該會比較快賣晒，但係我哋去食飯嘅時候係晚上嘅6:30 ，但係我哋想叫嘅好多樣餸，都一樣話賣晒。我估計應該係啲比較貴菜式，同埋一啲比較繁複嘅手工菜其實佢哋呢段時間唔做，所以就不如話俾你聽冇，例如我想要個花膠雞湯都係冇嘅，然後另外一個花膠湯都係冇嘅。最想食嘅嘢冇得食，已經食咗一肚氣，好彩食物質素都冇令我哋太失望。好似呢個乳豬咁，都算香脆。叫咗一個菜，我已經唔記得咗個名，不過不失。今晚最好食嘅係呢一個白灼響螺，螺肉鮮甜，得灼啱啱好，配合埋佢嘅薑絲食入口簡直食到唔停得口。我哋真係好想飲湯，不過乜湯都冇，最後我哋只好叫左一個菜膽湯，其實都煲得好好味，但係始終都唔係我哋最想飲嘅嘢。