走肉‧朋友 (Closed)

一個武漢肺炎令到唔少黃店叫苦連天，除咗打告急牌之外，我認為諗辦法自救更加重要，呢方面走肉 • 朋友就做得相當唔錯，佢哋好快就決定將自助餐變為自選餐，充分顯示出靈活變通，值得掌聲鼓勵👏👏。一直覺得呢度嘅素食自助餐係同類型食肆中質素最高嘅，除咗味道出色之外，食物款式仲充滿創意，不時令人有驚喜。而家晚餐做緊八十五蚊自選五餸，最受歡迎嘅口水雞同 pizza 依然保持水準，咖哩魚蛋啲蘿蔔非常入味好好食，芋頭魚啖啖芋泥最啱芋頭控，至於用油炸鬼造嘅鎮江骨味道極為像真，可惜口感略為偏硬。朋友揀嘅串燒，壽司同薯粉則屬正常水準。除咗主菜之外，呢度嘅白飯，粟米粥，湯水，蕃薯糖水，普洱茶同菊花茶全部任飲任食，絕對唔會驚唔夠飽。比較特別嘅係個龍脷葉枇杷葉煲雪梨湯，好足料，好好飲，據聞仲有抗疫清肺嘅作用，所以嗰晚我連啪咗三碗😆😆。食完出嚟，見到店外貼咗張恕不招待強國人嘅告示，倍覺放心又安心😌。