鍋卷鳴門 (Closed)

生日月，朋友同我嚟一個瘋狂海鮮夜！喺門口已經睇到自助區活海鮮嘅是日精選，竟然有賴尿蝦，好耐冇食過，有期望呀！放題有三個級別，湯底亦都有唔少選擇，想加錢食個清酒煮蜆湯，可惜今日冇，如果唔係用嚟煮海鮮應該好正！場內環境幾大，我哋兩個人就已經有一張大枱，可以放到好多嘢食。唔理咁多，即刻出去夾海鮮先！夾海鮮個筒比較細，一次夾唔到好多，如果大返啲就好喇。出到去個魚缸有好多新鮮嘅海鮮，隻隻生猛，揀啱邊隻就即刻夾起佢，再放入冰筒冰暈佢先。見每枱食客都好努力咁食海鮮，而我全晚都係去夾、淥、剪、拆、食，不停loop，好忙碌。 賴尿蝦咁大隻，肉質比較腍同鮮味！仲有九節蝦，肉質結實、爽彈，而且每個蝦頭都有蝦膏，滋味無窮；大連鮑魚唔使淥咁耐，咁就會有嫩滑口感，第一次無限食鮑魚，點可以唔食多幾隻呢，正！另外我好鍾意日式醬油蝦，係需時製造，上台嗰陣時熱辣辣，香味四溢。醬油味滲晒入隻蝦入面，咸香有特色。雖然美國牛小排同埋澳洲牛板鍵都好好食，不過今日佢唔係主角，我只係食咗每樣各一。飲品有支裝汽水、咖啡、朱古力、美祿、蜜桃茶、金橘蜂蜜綠茶⋯⋯最後要食埋甜品。吃喝玩樂嘅一晚，瘋狂又開心！