糖村 (Closed)

「糖村」喺台灣幾有人氣嘅法式牛軋糖品牌（即喺我哋慣叫開嘅鳥結糖），印象中大概兩年前都收過朋友嘅小禮品，就喺佢嘅原味牛軋糖，不過唔喺晌台灣買返嚟，而喺當時晌尖沙咀重慶站有間「糖妹妹糖」嘅糖果店有入貨轉售。今次，同事則晌銅鑼灣希慎廣場誠品書店嘅「糖村」專櫃買番嚟，可謂掛正名號，台灣直送 。咪以為同事送成盒俾小弟，只喺請我食幾粒，不過，佢都唔介意借晒成盒俾我影吓相，兼介紹吓。依款草莓牛軋糖全盒有16粒（210g），咪見個盒好似好大盒，查實墊高咗個底，睇落大盒啲，送俾人都好睇啲。粉紅色嘅牛軋糖每粒都以獨立透明包裝，方便衞生，不過食用期唔喺好長，一個月都無 。記得嗰時睇過佢哋個網頁（http://www.sugar.com.tw/tw），出品強調四大堅持：品質要新鮮，衛生安全做足功夫，食材要天然健康，手藝要不斷改進 。所以，都刻意再睇睇佢個成份標簽，果然無添加咩化學嘢。粉紅色外觀源自草莓醬，食落真喺幾香草莓味，又有陣陣牛奶味，軟硬適中，口感柔軟中帶煙韌，卻又唔太黏牙，而且，內裡仲有唔少草莓乾，確喺幾有水準 。好多謝同事嘅心意，讓小弟重溫糖村法式牛軋糖嘅滋味！